Handteknir við sviðsetningu á ráni

Lögreglan á höfuðborgarsvæðinu handtók í gær tvo menn sem höfðu skipulagt sviðsetningu á ráni í verslun í austurborginni.

Eftir því sem segir í tilkynningu lögreglunnar fóru rannsóknarlögreglumenn í verslunina með það fyrir augum að handtaka starfsmann vegna gruns um að hann hefði verið viðriðinn nýleg rán í annarri verslun í borginni.

Lögreglumennirnir höfðu ekki verið lengi inni í versluninni þegar grímuklæddur maður kom skyndilega inn vopnaður hnífi. Lögreglumennirnir handtóku manninn og reyndist vera um að ræða vin starfsmanns verslunarinnar. Var starfsmaðurinn því einnig handtekinn, en hann hafði einungis unnið í versluninni í fjóra daga.

Við yfirheyrslur kom í ljós að mennirnirnir, sem eru báðir á tvítugsaldri, höfðu undirbúið og skipulagt sviðsetningu á ráni í versluninni í þeim tilgangi að ná peningum, símainneignum og tóbaki.

Aðkomumaðurinn hafði verið klæddur í tvennar peysur og tvennar buxur. Þótt kalt hafi verið úti var það ekki skýringin á klæðnaðinum heldur ætlaði maðurinn að komast fljótt úr fötunum og henda af sér á leið af ránsvettvangi.

Við yfirheyrslu játaði aðkomumaðurinn að hafa ætlað að ræna verslunina og að starfsmaðurinn hefði undirbúið verknaðinn og látið sig vita þegar láta átti til skarar skríða, skömmu áður en lögreglumennirnir komu á vettvang.

Við húsleit heima hjá starfsmanni verslunarinnar fannst þýfi, sem tengist innbrotum, m.a. um nóttina í Borgarfirði. Um var að ræða fartölvur og skjávarpa.