Ekki grunur um berklasmit í Kópavogi

Rétt fyrir hádegi í dag kom til átaka í heimahúsi í Hjallahverfi í Kópavogi. Lenti þar tveimur mönnum saman og hlaut annar skurð á enni.

Samkvæmt upplýsingum frá lögreglu eru mennirnir af erlendu bergi brotnir og lék grunur á að annar mannanna væri smitaður af berklum. Sá grunur byggði á því sem mennirnir töluðu um á vettvangi.

Sá sem skurðinn hlaut var fluttur á sjúkrahús og hinn var handtekinn grunaður um verknaðinn. Málið er komið til rannsóknardeildar lögreglunnar.

Samkvæmt fréttamiðlinum mbl.is er ekki talið að maðurinn sé smitaður af berklum og er þar vitnað í lækni á slysadeild. Manninum var haldið í einangrun þar til þetta lá ljóst fyrir.