Stór hluti heimila er án lágmarks eldvarna

Borgarstjóri og slökkviliðsstjóri höfuðborgarsvæðisins boðuðu til blaðamannafundar í dag þar sem farið var yfir þær aðgerðir sem ráðist verður í vegna eldvarna. Meðal annars á að fjölga um eina slökkviliðsstöð, byggja tvær nýjar og loka þeirri sem nú er á Tunguhálsi.

„Slökkvilið höfuðborgarsvæðisins hefur verið undir miklu álagi að undanförnu vegna tíðra eldsvoða, auk mikilla anna vegna sjúkraflutninga, óveðurs og annarrar þjónustu sem liðið veitir," segir í tilkynningu. „Þessi hrina eldsvoða hefur því miður kostað eitt mannslíf, auk þess að valda fjölda fólks miklum ótta og andlegu álagi, svo ekki sé minnst á eignatjón. Í mörgum tilvikum virðist því miður sem eldar hafi verið kveiktir vísvitandi."

„Þessir atburðir hljóta að verða til þess að við sem höfum tekið að okkur að vinna að velferð íbúanna, sveitarfélögin á höfuðborgarsvæðinu og sameiginlegt slökkvilið þeirra, leitumst við að gera enn betur en áður til þess að tryggja líf og eignir og koma í veg fyrir alvarleg slys," segir einnig.

Þrátt fyrir að slökkviliðið haldi uppi öflugu forvarnar- og fræðslustarfi vegna eldvarna í íbúðar- og atvinnuhúsnæði kom fram á fundinum að ljóst sé að gera þurfi betur. „Staðreyndin er því miður sú að stór hluti heimila er án lágmarks eldvarna. Enginn eða aðeins einn reykskynjari er á nærri helmingi heimila í höfuðborginni. Innan við helmingur heimilanna í landinu hefur allt í senn; reykskynjara, handslökkvitæki og eldvarnateppi. Ljóst er að víða skortir á að eldvarnir í fjölbýlishúsum séu viðunandi."

Því hefur verið ákveðið að fjölga slökkvistöðvum eins og áður sagði og fjölga stöðugildum á forvarnarsviði. Félagsbústaðir munu einnig kanna hvort gera þurfi betur í eldvörnum í íbúðum í eigu borgarinnar og slökkviliðið mun bjóða húsfélögum að skoða eldvarnir í sameign fjölbýlishúsa án endurgjalds.