Tugir manna skoðaðir vegna hugsanlegs berklasmits

Verið er að prófa tugi manna til að kanna hvort þeir hafi smitast af berklum af ungum litháískum karlmanni sem greindist með berkla á Landspítalanum í nóvember síðastliðnum. Engin leið er að rannsaka heilsufar allra sem hingað koma frá fyrrum Sovétríkjum, þar sem fjölónæmir berklar eru útbreitt vandamál.

Ungi maðurinn frá Litháen er 23 ára gamall og var lagður inn á Landspítalann í nóvember vegna lungnasýkingar. Fram kemur í nýjustu Farsóttafréttum að rannsókn sýndi að hann var haldinn berklum. Nánari eftirgrennslan leiddi í ljós að hann hafði greinst með berkla í Litháen sumarið 2005.

Hann fór í berklameðferð þar í landi en henni var ekki lokið þegar hann útskrifaðist í mars 2006. Og berklarnir eru ennþá virkir í manninum enda eru þeir ónæmir fyrir mörgum venjulegum berklalyfjum. Hann er enn í meðferð hér og hefur líðan hans batnað.

Þegar maðurinn greindist hafði hann dvalið á Íslandi í tæpt ár. Að sögn Þorsteins Blöndals, læknis hjá Miðstöð sóttvarna við Heilsugæslu höfuðborgarsvæðisins, skipta þeir tugum einstaklingarnir sem verið er að prófa fyrir hugsanlegu berklasmiti. Það eru vinnufélagar Litháans unga, fólk sem hann umgekkst heima hjá sér og sömuleiðis fólk á spítalanum.

Tíu til tólf vikur líða frá því að fólk getur tekið í sig bakteríuna og þar til hún greinist. Enn hefur enginn orðið veikur. Því er of snemmt að segja hvort einhverjir hafi smitast af berklum úr þessum hópi.

Fjölónæmir berklar eru mikið vandamál í fyrrum Sovétríkjum, einkum Eystrasaltsríkjunum en þegnar þeirra þurfa ekki að skila heilbrigðisvottorði til að dvelja hér og starfa eftir að ríkin gengu í Evrópusambandið.