Umdeildur dómari veikur fyrsta daginn

Samkvæmt upplýsingum frá Héraðsdómi Norðurlands Eystri tilkynnti Þorsteinn Davíðsson sig veikan í morgun, í þann mund sem fyrsti formlegi vinnudagur hans eftir umdeilda stöðuveitingu var að hefjast.

Nokkur fiðringur var á meðal starfsfólks héraðsdóms í morgun enda vakti ráðning Þorsteins mikla athygli skömmu fyrir jól. Sérstaklega eftir að í ljós kom að við skipan hans var gengið fram hjá þremur umsækjendum sem sérstök matsnefnd taldi hæfari.

Vegna veikinda Þorsteins verður því einhver bið á því að Þorsteinn geti kynnt sig fyrir nýjum starfsfélögum og hafið störf.

Af ráðningarmálum hans er það hins vegar að frétta að Árni Mathiesen, sem skipaði Þorstein, mun innan skamms skila skriflegum rökstuðningi fyrir skipuninni.