Landsbjörg heimsækir eldri borgara í Garðabæ

Slysavarnafélagið Landsbjörg og Garðabær skrifa á morgun undir samning um öryggisheimsóknir til allra eldri borgara, 75 ára og eldri, í bæjarfélaginu á næstunni.

Í tilkynningu frá Landsbjörgu segir að samningurinn felist í því að fulltrúar Slysavarnafélagsins Landsbjargar bjóði þessum hópi eldri borgara í Garðabæ upp á heimsókn þar sem farið verður yfir heimili þeirra með tilliti til slysagildra. Starfsmenn munu einnig aðstoða íbúa við uppsetningu öryggisbúnaðar sé þess óskað.

Samkvæmt úttekt sem gerð var á slysum eldri borgara eru heima- og frítímaslys langstærsti slysaflokkurinn eða 75 prósent allra slysa. 18 prósent aldraðra sem slasast í heimahúsum þurfa á innlögn á sjúkrahús að halda og hluti þeirra kemst ekki heim aftur.