Bláu tunnurnar vinsælar í borginni

Hinar svokölluðu bláu ruslatunnur sem eingöngu eru notaðar undir pappír njóta sífellt meiri vinsælda í borginni og eru nærri 1700 slíkar nú komnar í umferð.

Í frétt frá umhverfis- og samgöngusviði borgarinnar segir að um það bil 50 tunnur sé pantaðar vikulega hjá Sorphirðu Reykjavíkur. „Tæplega 60 tonn af dagblöðum söfnuðust í marsmánuði í bláu tunnurnar en það er þriðjungur þess magns sem safnast í grenndargámana," segir Guðmundur B. Friðriksson hjá skrifstofu Neyslu- og úrgangs á umhverfis- og samgöngusviði.

Þrátt fyrir þetta hefur magn dagblaða í grenndargámum ekki minnkað. „Við náum greinilega til nýs hóps sem vill flokka pappír og annað sorp," segir Guðmundur og og bendir á að þar sem Reykvíkingar séu um þessar mundir 119 þúsund megi segja að hálft kíló af dagblöðum hafi safnast í bláar tunnur á hvern íbúa í marsmánuði.

Viðskiptavinir Sorphirðunnar virðast ánægðir með veitta þjónustu vegna bláu tunnunnar að mati Guðmundar og nefnir hann því til stuðnings tölvuskeyti sem barst nýlega frá einum þeirra: „Í gærkvöldi klukkan 21:11 sendi ég tölvuskeyti til þess að panta bláa tunnu fyrir dagblöð og annan pappír. Klukkan 09:15 í morgun var tunnunni rúllað inn stíginn hjá okkur og stillt upp bak við hús. Viðbragðstími: 12:04! Ætli það gerist betra á öðrum bæjum!"