Alvarleg árás á Hverfisgötu

Fjórir grímuklæddir menn ruddust inn í hús á Hverfisgötu um tíuleytið í gærkvöld og réðust með bareflum á fjóra íbúa sem þar voru inni. Tveir íbúanna voru fluttir á slysadeild með höfuðáverka. Að sögn lögreglu meiddust hinir tveir íbúanna einnig, en þeir vildu ekki leita sér aðstoðar læknis. Bæði árásarmennirnir og þeir sem ráðist var á eru af erlendu bergi brotnir og telur lögregla að þeir þekkist að einhverju leyti. Árásarmennirnir náðust ekki og er þeirra nú leitað.

Á Akureyri voru jafnframt tvær líkamsárásir tilkynntar til lögreglu í nótt. Lögreglan á Akureyri gat ekki gefið nákvæmar upplýsingar um málsatvik að öðru leyti en því að talið væri að þeir sem urðu fyrir árásunum hafi ekki slasast alvarlega.