Varað við snjóflóðahættu á norðanverðum Vestfjörðum

Lögreglustjórinn á Vestfjörðum hefur í samráði við Veðurstofu Íslands lýst yfir viðbúnaði á Norðanverðum Vestfjörðum vegna snjóflóðahættu. Sérstaklega er verið að horfa til ástands snjóalaga á Ísafirði, Bolungarvík og við helstu umferðaræðar um Eyrarhlíð, Óshlíð, Kirkjubólshlíð og Súðavíkurhlíð.

Fram kemur í tilkynningu lögreglunnar að þeir íbúar Bolungarvíkur, Hnífsdals og Súðavíkurhrepps sem ekki séu komnir til síns heima séu hvattir til að flýta heimför sinni vegna aukinnar hættu á snjóflóðum á vegi. Aðrir íbúar í fjórðungnum eru hvattir til þess að vera ekki á ferðinni innan bæja eftir kl. 17 nema brýna nauðsyn beri til og þá í samráði við lögreglu og Vegagerð.

Búist er við illviðri á Vestfjörðum og að vindur nái allt að 30 metrum á sekúndu þegar verst lætur með mikilli úrkomu. Veðrið mun ná hámarki seint í kvöld en gert er ráð fyrir að því fari að slota um miðnætti í kvöld.