Utanríksiráðherrar norrænu ríkjanna vilja lýðræði í Simbabve

Utanríkisráðherrar norrænu ríkjanna hafa sent frá sér yfirlýsingu þar sem tekið er undir ályktun öryggisráðs Sameinuðu þjóðanna varðandi ástandið í Simbabve.

Þar er pólitískt ofbeldi í Simbabve fordæmt og skorað er á stjórn Simbabve að stöðva ofbeldisölduna sem riðið hefur yfir, að láta þegar í stað af hótunum í garð stjórnarandstæðinga, leyfa fundi og samkomur og láta lausa stjórnmálaleiðtoga sem hafa verið teknir höndum.

Fram kemur á heimasíðu utanríkisráðuneytisins að ráðherrarnir hafi miklar áhyggjur af þróun mála í Simbabve, þar sem ofbeldisverk og árásir stjórnvalda hafa aukið gríðarlega á vanda óbreyttra borgara og grafið undan trúverðugleika forsetakosninganna sem halda á á föstudag. Segja ráðherrarnir ljóst að kosningaferlið brjóti í bága við allar reglur sem gilda um frjálsar og réttlátar kosningar.

Tilbúin að styðja lýðræðislega stjórn

Bent er á að norrænu ríkin hafi átt mikil og vaxandi samskipti við samtök ríkja í sunnanverðri Afríku, SADC, þar sem lögð hafi verið áhersla á frið, mannréttindi, lýðræði og uppbyggingu réttarríkja. „Í ljósi þessa skora utanríkisráðherrar Norðurlandanna á ríkin í sunnanverðri Afríku að grípa þegar í stað til aðgerða til að finna lýðræðislega lausn á ástandinu. Fagna ráðherrarnir tilraunum Sambíu, sem fer fyrir ríkjahópnum, til að finna lausn á ástandinu. Þá skora ráðherrarnir á Afríkubandalagið að koma beint að lausn á ástandinu í Simbabv," segir í yfirlýsingunni.

Þá krefjast norrænu ráðherrarnir þess að öryggi Morgans Tsvangirari, leiðtoga stjórnarandstöðflokksins MDC, verði tryggt en hann neyddist til að leita skjóls í sendiráði Hollands í höfuðborginni Harare á dögunum.

Ráðherrarnir segja enn fremur að binda verði enda á ofbeldi og leggja verði drög að lögmætri, lýðræðislegri og umbótasinnaðri stjórn í Simbabve. Norrænu ríkin séu reiðubúin að veita slíkum stjórnarumbótum öflugan stuðning og munu leggja á það höfuðáherslu í samskiptum sínum við ríkin í sunnanverðri Afríku.