Í þriggja vikna varðhald vegna misheppnaðs ráns

Starfsmaður Sunnubúðar sem handtekinn var í gær fyrir að sviðsetja rán í búðinni ásamt félaga sínum var í dag úrskurðaður í þriggja vikna gæsluvarðhald og síbrotagæslu að sögn lögreglu.

Félagi hans sem kom grímuklæddur inn í verslunina var hins vegar ekki úrskurðaður í gæsluvarðhald en þar sem hann hafði ekki greitt sekt, sem hann hafði áður fengið, innan tilskilins tíma var hann settur í sex daga fangelsi.

Mennirnir sem báðir eru á tvítugsaldri voru fluttir á lögreglustöð og við yfirheyrslu kom í ljós að þeir höfðu undirbúið og skipulagt sviðsetningu á ráni í versluninni í þeim tilgangi að ná peningum, símainneignum og tóbaki.

„Maður er bara alveg sjokkkeraður, ég var nýbúinn að ráða hann vinnu. Hann var búinn að vinna í búðinni í þrjá daga, ég sleppti honum í klukkutíma og þá gerist þetta," segir Þórður Björnsson, eigandi Sunnubúðar í samtali við Vísi.