Björgólfur Guðmundsson kennir stjórnvöldum um ófarirnar

Björgólfur Guðmundsson segir að íslensk stjórnvöld og Seðlabankinn geti ekki hlaupið frá ábyrgð sinni á stjórn peningamála undanfarin ár.

Í viðtali við Morgunblaðið segir hann að allt of hátt vaxtastig, útgáfa jöklabréfa upp á mörg hundruð milljarða, gífurlegur vaxtamunur sem Íslendingar hafi greitt til útlendinga ár hvert, séu allt afleiðingar af peningastjórn Seðlabankans og ríkisstjórnarinnar, sem Björgólfur kallar „óstjórn". Þá segir Björgólfur að það gangi ekki upp hjá stjórnvöldum að halda því fram að allt sem úrskeiðis hefur farið sé bönkunum að kenna.

Björgólfur var stjórnarformaður Landsbankans sem féll í byrjun þessa mánaða með þeim afleiðingum að Íslendingar og Bretar eiga nú í harðvítugri milliríkjadeilu vegna innistæðra breskra sparifjáreigenda í Icesave, netbanka Landsbankans í Bretlandi.