Benjamín Þór ákærður aftur

Benjamín Þór Þorgrímsson, líkamsræktarþjálfari, verður að öllum líkindum ákærður á nýjan leik fyrir líkamsárás, að sögn Jóns H. B. Snorrasonar saksóknara og aðstoðarlögreglustjóra lögreglu höfuðborgarsvæðisins. ,,Ég á ekki von á öðru en gefin verði út ný ákæra.

Benjamín Þór var ákærður fyrir líkamsárás á Ragnar Ólaf Magnússon og var árásin sýnd í Kompásþætti í haust sem fjallaði um handrukkanir á Íslandi.

Fyrr í dag vísaði Héraðsdómur Reykjavíkur ákærunni frá vegna þess að lögreglan gaf út tvær ákærur. Í úrskurði héraðsdóms segir að ákæruvaldinu séu settar þröngar skorður um leiðréttingu eða breytingu á ákæru. Þrátt fyrir það kemur fram í úrskurðinum að lögreglan á kost á því að höfða mál á nýjan leik gegn Benjamín Þór.

,,Það var freistast til þess að gera leiðréttingu á ákærunni áður en hún var þingfest með því að senda leiðrétt eintak. Fyrir handvömm hjá réttinum var þetta eintak sem átti að leiðrétta áfram meðal þeirra skjala sem verjandinn fékk," segir Jón.

Aðspurður segir Jón óalgengt að leiðrétta þurfi ákærur líkt og gert var í þessu tilviki.