Harmar rasistatal í tengslum við bílslys

Anna Guðbjörg Kristinsdóttir, móðir Kristins Veigars Sigurðssonar, sem lést í hörmulegu bílslysi skömmu fyrir síðustu jól, segir það vera agalega sorglegt hvað fólk sé fljótt að snúa umræðu um málið upp í rasistatal. Í Kompási í gær biðluðu foreldrar Kristins Veigars til almennings um ábendingar sem gætu gagnast við að upplýsa um hver hefði ekið bifreiðinni á drenginn.

Anna Guðbjörg vísar meðal annars í umræðu sem átti sér stað í símatíma í þættinum „Í bítið á Bylgjunni" í morgun. „Fólk er að segja að lausnin sé að senda alla heim, en það er aldrei nein lausn," segir Anna. Hún segir það mjög leiðinlegt að allir séu settir undir einn hatt. „Börnin mín eru með Pólverjum í bekk í skólanum og það er allt yndislegt fólk," segir Anna.

Anna Guðbjörg segist hafa fengið að sjá þáttinn áður en hann fór í loftið en hún hafi ekki treyst sér til að horfa á hann í gærkvöld. „Þetta var rosalega erfitt, en ég var rosa ánægð með það hvernig hann var unninn. Það kom allt þarna fram sem ég vildi að kæmi fram," segir Anna.

Jóhannes Jensson, yfirmaður rannsóknardeildar lögreglunnar á Suðurnesjum, segir að lögreglunni hafi borist hringingar og tölvuskeyti með ábendingum eftir að þátturinn var sýndur í gær. Hins vegar hafi ekkert nýtt komið fram í þeim ábendingum.