Ásdís Rán keppir um milljónirnar

Íslensk fyrirsæta og þriggja barna móðir keppir nú um að komast að í áströlskum raunveruleikaþætti þar sem sigurlaunin eru 1 milljón dollara eða 65 milljónir íslenskra króna. Við lok dags í gær var hún í öðru sæti í keppninni.

Ásdís Rán Gunnarsdóttir er Íslendingum að góðu kunn en hún rekur meðal annars módelskrifstofu hér á landi og er gift knattspyrnumanninum Garðari Gunnlaugssyni sem leikur í Svíþjóð.

Keppnin sem hún tekur nú þátt í kallast Er hún heit eða Is she hot og fer hún fram á afþreyingarvefnum savvy.com.

Keppnin gengur út að gefa þáttakendum einkunn fyrir fegurð þeirra og kynþokka og stendur keppnin yfir út árið. Sigurvegari hvers mánaðar fær að launum sæti í raunveruleikaþætti í Ástralíu þar sem sigurlaunin nema einni milljón dollara eða um 65 milljónum króna.

Framan af í gær sat Ásdís Rán í efsta sætinu fyrir febrúarmánuð en undir morgun datt hún niður um sæti og hafnaði því líklega í öðru sæti en það verður þó ekki ljóst fyrr en á þriðjudag.

Á heimasíðu keppninnar má lesa bloggfærslur Ásdísar Ránar frá í morgun þar sem hún hvetur Íslendinga til að kjósa enda komi mánuður eftir þennan en hún hefur sagst ætla að gefa hluta af verðlaunafénu til góðgerðamála beri hún sigur úr bítum.