Hátíðahöld á 60 ára afmæli Land Rover

Haldið verður upp á 60 ára afmæli Land Rover bílana í húsakynnum B&L við Grjótháls 1, á milli klukkan tólf og fjögur í dag.

Klukkan 16:15 leggja Land Rover eigendur svo upp í hópakstur um borgina. Öllum velkomið að slást í hópinn.

Ekið verður í langri halarófu niður Ártúnsbrekkku, vestur Kleppsveg, Sæbraut, framhjá tónlistarhúsinu nýja, Mýrargötu, út á Granda, framhjá JL-húsinu, austur Hringbrautin til baka, Miklabrautina, beygt til vinstri inn á Kringlumýrabraut, til hægri inn á Suðurlandsbraut og svo loks vinstri aftur niður í Laugardal en stoppað verður á bílaplaninu við Laugardalsvöllinn og þar endar hópaksturinn.

Í tilkynningu um málið segir að saga Land Rover og Íslands er samofin en fyrsti bíllinn kom hingað til lands árið 1948, sama ár og Rover bílasmiðjan hóf fyrst framleiðslu sína í Bretlandi.

Svo skemmtilega vill til að fyrsti Land Rover-inn sem hingað kom hefur varðveist og verður hann einnig til sýnis í B&L í dag. Einnig verða sýnda gamlar íslenskar Land Rover auglýsingar sem fundist hafa frá 1950.

Og eins og siður er í afmælisveislum þá verður boðið upp á pylsur og gos. Land Rover eigandi númer 1: Bubbi Morthens, mætir svo upp úr kl.13 og tekur lagið. Einnig verða blöðrur og andlitsmálning fyrir börnin.