INTERPOL leitar barnaníðings

Alþjóðalögreglan INTERPOL kallar eftir hjálp almennings við leit að manni sem hefur sést misnota börn á fjölmörgum myndum sem dreift hefur verið á Netinu. Myndirnar fundust í tölvu dæmds barnaníðings.

Nafn mannsins, þjóðerni og staðsetning eru óþekkt. Hann sést á um það bil 100 myndum sem talið er að hafi verið teknar í Suðaustur Asíu. Þar sést hann misnota að minnsta kosti þrjá drengi á aldrinum 6 - 10 ára. Það var lögreglan í Noregi sem uppgötvaði fyrstu myndirnar í mars árið 2006.

„Lögregluyfirvöld víðs vegar um heim hafa gert allt sem í þeirra valdi stendur til að finna þennan mann sem ungum börnum stendur augljóslega ógn af. Því biðjum við almenning um að hjálpa okkur að bera kennsl á þennan níðing og koma í veg fyrir að önnur börn verði misnotuð," segir Ronald K. Noble, framkvæmdastjóri INTERPOL, í tilkynningu til fjölmiðla.

„Þegar við gáfum út svipaða yfirlýsingu á síðasta ári náðum við Christopher Paul NEIL með aðstoð frá almenningi. Hann situr nú í fangelsi og á yfir höfði sér ákærur vegna misnotkunar á börnum. Við vonum að fólk víðs vegar um heiminn muni hjálpa okkur við að finna þennan mann," segir Noble.