Fjórar verðandi mæður fluttar með sjúkrabílum í nótt

Fjórum nýjum þjóðfélagsþegnum lá svo á í heiminn á höfuðborgarsvæðinu í nótt að hringt var á sjúkrabíla til að flytja mæðurnar á fæðingardeildina.

Þetta eru óvenju mörg útköll af þessu tagi því venjulega aka verðandi feður eða aðrir nákomnir verðandi mæðrum þangað. Konurnar voru allar komnar að því að eiga nema hvað ein var orðin léttari og lítill snáði var kominn í heiminn, þegar sjúkraflutningamenn komu á vettvang. Móður og dreng heilsast vel en voru þó flutt á fæðingardeildina.

Sjúkraflutningamenn veltu fyrir sér hvort mæðufnar hafi verið að sýna fyrirhyggju og tryggja sér fulla þjónustu en fyrsta verkfall ljósmæðra hefst á miðnætti, aðfararnætur fimmtudags, eftir að samningafundur þeirra við fulltrúa ríkisins fór út um þúfur í gær.