Kostnaður við einkaflugvél óljós

Einkaflugvélin sem Þórunn Sveinbjarnardóttir umhverfisráðherra leigði þegar hún flaug norður á Skaga í fyrradag vegna ísbjarnar var frá flugfélaginu Erni. Ásamt ráðherra voru sex starfsmenn ráðuneytisins með í för. Samkvæmt upplýsingum frá ráðuneytinu á eftir að meta kostnaðinn við ferðina.

„Ég geri ráð fyrir því að kostnaðartölur verði komnar á hreint síðar í dag," segir Guðmundur Hörður Guðmundsson, upplýsingafulltrúi umhverfisráðuneytisins.

Ekki eru allir á eitt sáttir með ákvörðun Þórunnar Sveinbjarnardóttir að leigja flugvél til að komast á vettvang ísbjarnardrápsins á Skaga. Þórunn var nýkomin úr fríi og hafði Björgvin G. Sigurðsson verið settur umhverfisráðherra.

„Hún kom með áætlunarflugi heim eins og til stóð. Hafði verið í helgarfríi í Osló. Vegna umfang málsins var ákveðið að fara með hóp norður, starfsfólk ráðuneytisins og fleiri. Samtals voru sjö í vélinni ásamt umhverfisráherra," segir Guðmundur.

Guðmundur gat ekki gefið upp nákvæman kostnað við ferðalagið en sagði fréttatilkynningu að vænta um málið síðar í dag.