Hægt að bjóða út rekstur á ráðherrabílum

Guðmundur Hannesson, forstöðumaður ráðgjafarsviðs Innkaupastofnunar, segir að hægt sé að bjóða út kaup og rekstur á ráðherrabifreiðum. ,,Það er hugsanlegt. Það er hægt að bjóða allt út," segir Guðmundur.

Guðmundur segir eðlilegt að skoða reksturinn almennt. ,,Aftur á móti er varasamt að segja nú skulum við taka ráðherrabílana og bjóða þá út og sjá hvað gerist. Það þarf að hafa skýr markmið og tryggja að ráðherrunum sé tryggð sama þjónusta og þeir hafa í dag," segir Guðmundur.

Nauðsynlegt er að horfa á heildarmyndina og taka hliðsjón af því hvað kostar að skipta úr einu rekstrarformi yfir í annað. ,,Það þarf alltaf að spyrja hvað eitthvað kostar í dag, hvað myndi kosta að bjóða það út og hvað fengu við í staðinn. Ef það er ekki gert þá getur maður sitið uppi með jafngóðar lausnir en kostnaðurinn við að skipta yfir gæti reynst þegar uppi er staðið mikill," segir Guðmundur.

Guðmundur segir frumkvæði að breyttu rekstrarformi ráðherrabifreiða verða að koma frá forsætis- eða fjármálaráðuneytinu. Þau geta leitað til Ríkiskaupa og beðið um að hugsananleg tilfærsla verði skoðuð. ,,Hjá okkur er talsverð kunnátta til að greina svona hluti. Einnig er hægt að leita til einkaaðila sem veita ráðgjafaþjónustu," segir Guðmundur.