Komið í veg fyrir kortasvik

Þjónustuaðili Mastercard hér á landi þurfti að innkalla 63 greiðslukort í síðustu viku eftir að upp komst um kortasvik á Netinu. Ekki er talið að fólk hafi orðið fyrir fjárhagslegu tjóni vegna þessa.

Upp komst um kortasvindlið í síðustu viku en það var alþjóðlegur eftirlitsaðili Mastercard sem gerði íslenskum kortafyrirtækjum viðvart.

Um er að ræða 63 íslensk greiðslukort en grunur leikur á að kortanúmerum þeirra hafi verið stolið úr erlendum gagnabanka sem heldur meðal annars utan um verslun á Netinu.

Samkvæmt upplýsingum frá Borgun hf. þjónustuaðila Mastercard á íslandi er ekki vitað til þess að fólk hafi orðið fyrir fjárhagslegu tjóni vegna þessa.

Brugðist hafi verið skjótt við og kortunum lokað og tilkynning send til þjónustuaðila. Viðskiptavinir hafi síðan fengið ný kort þeim að kostnaðarlausu.

Hjá Kreditkort hf. fengust þær upplýsingar að í svona tilvikum séu viðskiptavinir að fullu tryggðir og þeim bætt allt það tjón sem þeir kunna að verða fyrir.

Ekki er óalgengt að kortanúmerum sé stolið á netinu. Á hverjum mánuði berast að meðaltail um 5 til 15 tilkynningar þessa efnis til þjónustuaðila hérlendis.