Norður-Víkingur leifar af kalda stríðinu

Samtök hernaðarandstæðinga lýsa vonbrigðum sínum með að íslensk stjórnvöld skuli eina ferðina enn ákveða að gera landið að æfingasvæði erlends herliðs.

Þetta kemur fram í ályktun frá samtökunum í tilefni þess að heræfingin Norður-Víkingur fer fram hér á landi. Hernaðarandstæðingar segja æfinguna leifar frá kalda stríðinu og hafi engu jákvæðu hlutverki að gegna fyrir íslenskt samfélag eða umheiminn. Hernaðarbrölt af þessu tagi hafi engan tilgang nema ef vera skyldi til að þjálfa erlenda herflugmenn og búa þá undir að taka þátt í hernaði í fjarlægum löndum.

„Þá verður ekki framhjá því litið að heræfingar eru, líkt og önnur hernaðarumsvif, afar kostnaðarsamar og hafa haft mikil óþægindi í för með sér fyrir íbúa og gesti landsins, með tilheyrandi lágflugi herflugvéla og lokun svæða. Erfitt er að ímynda sér fánýtari leið til að eyða fé úr sameiginlegum sjóðum borgaranna en æfingar af þessu tagi," segir í ályktun Samtaka hernaðarandstæðinga.