Einni og hálfri milljón safnað í Esjugöngu

Á áttunda hundrað voru skráð í Esjugöngu Kaupþings sem fram fór í gær, laugardaginn 30. ágúst. Gengið var til styrktar „Á allra vörum - átak gegn brjóstakrabbameini" en bankinn hét tvö þúsund krónum á hvern þann sem skráði sig til leiks. Samtals söfnuðust 1.570 þúsund krónur og var forsvarsmönnum átaksins afhent ávísun fyrir þeirri upphæð að lokinni göngu.

Hver og einn gekk eins og hann hafði orku og getu til. Flestir fóru upp að svokölluðum Steini, en nokkrir alla leið. Þegar niður var komið beið göngugarpanna hressing og þrátt fyrir kalsaveður, rigningu og nokkuð rok, voru allir glaðir og ánægðir. Ekki er ljóst hvort þetta er mesti fjöldi sem lagt hefur leið sína á fjallið í einu, en væntanlega er þetta með fjölmennari göngum á Esjuna.

Þetta kemur fram í fréttatilkynningu frá Kaupþingi.