Steingrími vel tekið á Evrópuþinginu

Steingrímur J. Sigfússon fékk mjög jákvæðar undirtektir við málstað Íslendinga þegar hann ræddi beitingu Breta á hryðjuverkalögunum, á Evrópuþinginu í gær.

Málið var að beiðni Steingríms tekið fyrir utan dagskrár á stjórnarnefndarfundi Evrópuráðsins í Brussel. Hann hafði framsögu og eftir það tóku allmargir þingmenn aðrir til máls.

Þótti þáttakendum almennt miður að Bretar skyldu hafa farið þessa leið. Einn þingmaður þó Bretum til varnar.

Það var stjórnarþingmaður breska Verkamannaflokksins sem reyndi að bera í bætifláka fyrir Breta, en viiðurkenndi þó að ástæða væri til þess að rannsaka málið og gera um það skýrslu," segir Steingrímur.

En í persónulegum samtölum við Steingrím komust menn mun sterkar að orðum en í ræðum sínum, og lýstu furðu sinni á því að Bretar hefðu gengið svona langt.

Steingrímur sagði að hann hefði vakið máls á þessu þar sem sér þætti nauðsynlegt að koma Íslandi til varnar hvar og hvenær sem möguleiki gæfist.