Haraldur skrifaði Geir vegna bloggs Össurar

Ríkislögreglustjóri skrifaði forsætisráðherra bréf vegna nýlegrar bloggfærslu iðnaðarráðherra um upplýsingahvarf úr bókhaldi forsetaembættisins.

Össur Skarphéðinsson, iðnaðarráðherra, gerir jólatónleika lögreglukórsins að umfjöllunarefni á heimasíðu sinni og greinir frá því að helstu forystumenn lögreglunnar hafi mætt fyrir utan Harald Johannessen, ríkislögreglustjóra. Össur telur að Haraldur hafi hugsanlega ekki komist vegna anna í vinnu. Mikið sé í gangi og það sé margt sem þurfi að fylgjast með.

,,Hugsanlega hefur hann verið að skrifa forsætisráðherra annað bréf út af nýbirtum pistli iðnaðarráðherra um upplýsingahvarf úr bókhaldi forsetaembættisins. Ég hlakka mikið til ef ég fæ afrit af því.," segir hann.

Í seinustu viku fullyrti Össur að Ólafur Ragnar Grímsson, forseti Íslands, ætti við að glíma hnitmiðað áhlaup óvildarmanna sem höfðu komist yfir stolin gögn úr stjórnsýslunni um bókhald forsetaembættisins. Fréttastofa Stöðvar 2 og Vísis birti fyrr í mánuðinum upplýsingar um símakostnað forsetaembættisins. Össur furðaði sig á því af hverju lögreglan hefði ekki skoðað hver stal gögnunum.

,,Samkvæmt því áhugaleysi virðist yfirmanni löggæslu finnast í góðu lagi þó farið sé inn í opinber skjöl sem ég hefði haldið að þyrfti sérstakan bókhaldslykil til að komast í," sagði iðnaðarráðherra í seinustu viku og bætti við að Haraldur væri ef til vill farinn að virða upplýsingalögin á sinn hátt.

Í ljósi bréfaskrifa ríkislögreglustjóra vegna bloggfærslunar segir Össur að hann fá yl í sig yfir vitneskjunni um að vökulir embættismenn mikilvægra embætta séu vaktir og sofnir yfir því að grandskoða skrif borgaranna.

,,Hjá ríkislögreglustjóra eru kvöldverkin drjúg, ekki síður en morgunverkin hjá Guðrúnu Ósvífursdóttur sem spann tólfa álna garn meðan Kjartan var veginn. Sagði ekki góði dátinn Svejk að það þyrfti að vera agi í hernum?" segir Össur.

Ekki náðist í iðnaðarráðherra vegna málsins.