Afleysingamenn í umdeildri handtöku

„Við áttum fund um þetta mál í morgun og erum að safna gögnum til þess að glöggva okkur betur á öllum hliðum þess," segir Jóhann R. Benediktsson lögreglustjóri á suðurnesjum. Ungur drengur var handtekinn þegar umsátursástand ríkti á heimili í Keflavík á fimmtudagskvöldið en þar hafði karlmaður læst sig inni á klósetti með haglabyssu.

Í DV í dag er því lýst þegar lögreglan handtók tvítugan pilt á vettvangi. Lögeglan lokaði nærliggjandi götum en þegar pilturinn ætlaði að komast á heimili föður síns var hann handtekinn. Í blaðinu er því haldið fram að hann sé margbrotinn í andliti eftir átök við lögreglu sem einnig beitti piparúða á föður hans. Feðgarnir segjast ætla að kæra lögreglu.

„Þeir hafa ekki haft samband við okkur og það hefur engin kæra borist vegna atviksins," segir Jóhann en fyrir liggur að þrír lögreglumenn á vegum embættisins voru á vettvangi.

„Tveir af þessum þremur eru afleysingamenn og því ómenntaðir lögreglumenn. Það eina sem ég get sagt á þessu stigi málsins er að fyrirmælum á vettvangi var ekki hlýtt og við erum að skoða hvað gerðist í kjölfarið," segir Jóhann.

Í DV kemur fram að pilturinn hafi verið keyrður niður í götuna og handjárnaður, með þeim afleiðingum að hann hlaut nefbrot, kinnbeinsbrot, beinbrot í olnboga auk þess sem tennur losnuðu.