Býst við að sjúkratryggingafrumvarp verði klárað hratt og vel

Guðlaugur Þór Þórðarson heilbrigðisráðherra gerir ráð fyrir að frumvarp um almannatryggingar verði samþykkt fyrir þinglok og segir að í frumvarpinu sé verið að færa lagagreinar úr öðrum lögum í einn lagabálk.

Valgerður Sverrisdóttir, varaformaður Framsóknarflokksins, vakti á þingfundi í dag athygli á orðum heilbrigðisráðherra við upphaf þings í haust. Þar hefði Guðlaugur Þór boðað nýja stefnu í heilbrigðismálum og sagt að leitað yrði sem víðtækatrar sáttar um hana.

Vinnubrögð hans nú væru hins vegar ekki í samræmi við það, sagði Valgerður, því ráðherra hefði í gær lagt fram frumvarp um sjúkratryggingar sem formaður heilbrigðisnefndar hefði sagt að afgreiða ætti fyrir þinglok. Málið væri hins vegar ekki á dagskrá þingsins í dag eins og til hefði staðið og því sagðist Valgerður gera sér vonir um að því yrði frestað enda væri það umfangsmikið.

Guðlaugur Þór Þórðarsson heilbrigðisráðherra hvatti þingmenn til þess að fara yfir það hvað væri í frumvarpinu. Þegar það væri í gert kæmi í ljós að fyrst og fremst væri verið að færa hluti sem væru í öðrum lögum yfir í annan lagabálk. Benti Guðlaugur Þór á að allur þingheimur hefði samþykkt heilbrigðislög í fyrra en þar væri skilgreint kaupendahlutverk heilbrigðisþjónustu.

Hér væru á ferðinni eins góð vinnubrögð og mögulegt væri. Sagði hann að ef menn settust niður og skoðuðu frumvarp um sjúkratryggingar gætu þeir ekki komist að annarri niðurstöðu en að ljúka málinu hratt og vel.