Vísar á Geir varðandi Bretavarnir

,,Ég vísa til svara forsætisráðherra um þetta mál, hann svarar fyrir hönd ríkisstjórnarinnar," segir Björn Bjarnason, dómsmálaráðherra í svarbréfi til Vísis varðandi fyrirhugað loftrýmiseftirlit breska hersins í desember.

Björn var annars vegar spurður af því hvort að hann telji eðlilegt að ríki sem beitir hryðjuverkalöggjöf sinni gagnvart öðru ríki annist varnir og loftrýmiseftirlit fyrir sama ríki. Hins vegar hvort hann telji að ríkisstjórnin eigi að afþakka fyrirhugað loftrýmiseftirlit Breta.

Össur Skarphéðinsson, starfandi utanríkisráðherra, sagði eftir ríkisstjórnarfund á föstudaginn að það myndi misbjóða þjóðarstolti Íslendinga ef Bretar kæmu til Íslands til þess að verja landið. Hann sagði íslensk stjórnvöld hafa komið á framfæri þeim skilaboðum til NATO að ekki væri þörf á því að Bretar annist loftrýmisgæslu Íslands.

Eftir sama ríkisstjórnarfund sagði aftur á móti Geir H. Haarde, forsætisráðherra, að engin ákvörðun hefði verið tekin í málinu. Verið væri að fara yfir málið og sömuleiðis leysa nokkur mál með Bretum.