Íslenskir MND sjúklingar taka þátt í erlendri lyfjatilraun

Fjórir íslenskir MND sjúklingar eru á leið til Bandaríkjanna til að taka þátt í lyfjatilraun á vegum Mount Sinai sjúkrahússins New York. Í tilrauninni verður kannað hvernig sjúklingarnir bregðast við töku malaríulyfsins Pyrimethamine og hvort taka þess hafi áhrif á tiltekið eggjahvítuefni sem talið er að geti verið meðvirkandi ástæða fyrir frumubreytingum sem eiga þátt í MND sjúkdómnum, að því er segir í tilkynningu frá MND félaginu.

„Þátttaka fjórmenninganna í rannsókninni er kostuð af „Dollar á mann" rannsóknasjóði MND félagsins sem á síðasta ári leitaði til íslenskra fyrirtækja um styrki til MND rannsókna. Með góðri aðstoð íslenskra fyrirtækja tókst að safna jafnvirði eins dollars á hvern íslending í sjóðinn og er þátttakan í lyfjatilrauninni í New York eitt fyrsta verkefnið sem sjóðurinn tekur þátt í," segir í tilkynningunni.

Guðjón Sigurðsson formaður MND félagsins er einn þeirra sem taka þátt í tilrauninni og fer hann utan á morgun ásamt Kristni Guðmundssyni, sem einnig er með MND og munu þeir gangast undir síðustu rannsóknir áður en þátttaka þeirra í sjálfri lyfjatilrauninni verður staðfest. „Um mánuði síðar munu þau Edda Heiðrún Backman og Arnmundur Jónasson halda utan og taka þátt í sömu tilraun. Um er að ræða 18 vikna meðferð sem byrjar og lýkur í New York en þess á milli munu læknar og hjúkrunarfræðingar á taugadeild Landspítalans í Fossvogi sjá um eftirlit og lyfjagjöf hér á landi. Guðjón segir að vissulega bindi menn vonir við að meðferðin skili árangri og færi þau nær lausn á þeirri ráðgátu sem MND sjúkdómurinn er, en reynslan hafi kennt þeim að stilla væntingum í hóf."

Þá kemur einnig fram að Lyfjatilraunin á Mount Sinai sjúkrahúsinu í New York sé nú gerð í fyrsta skipti með þátttöku sjúklinga en áður hafa farið fram ítarlegar rannsóknir á rannsóknastofum. Auk íslendinganna fjögurra munu sextán aðrir sjúklingar taka þátt í þessari fyrstu tilraun.

„Grétar Guðmundsson taugalæknir mun fylgjast með tilrauninni af hálfu Landspítala. Hann segir að áhrif malaríulyfsins Pyrimethamine á sjúklinga séu vel þekkt þegar það er gefið í stuttan tíma við ákveðnum sýkingum. Í þessari rannsókn sé hins vegar verið að kanna hvort notkun lyfsins í stigvaxandi skömmtun í lengri tíma geti haft jákvæð áhrif á þetta tiltekna eggjahvítuefni í frumum sjúklinga. Hann segir að undanfarin ár hafi mikill fjöldi nýrra og eldri lyfja og efnasambanda verið rannsakaður í leit að meðferð við MND sjúkdóminum og þótt þær tilraunir hafi enn ekki borið tilætlaðan árangur sé nauðsynlegt að halda leitinni áfram."

Helstu styrktaraðilar þessa verkefnis eru „Dollar á mann" sjóðurinn, KFC og Góa, Loga golf og Orkuveita Reykjavíkur.

Þeir sem vilja styðja þessa baráttu geta lagt inn á reikning MND félagsins: 1175-05-410900. Kennitala: 630293 3089.