Óttast að toppnum sé ekki náð

Gylfi Arnbjörnsson, nýkjörinn forseti ASÍ, segir nýjar verðbólgutölur skelfilegar og óttast að toppnum sé ekki náð. Líkt og fram kom á Vísi í morgun mældist verðbólgan 15,9 prósent og jókst um 1,9 prósentustig frá því í september. „Þetta undirstrikar mikilvægi þess að við náum fram styrkingu krónunnar og trúverðugleika á gjaldeyrismörkuðum," segir Gylfi sem þó er bjartsýnn á framhaldið.

„Sérstaklega með aðkomu Alþjóðagjaldeyrissjóðsins þó við viljum ganga lengra í því að byggja upp væntingar í umheiminum. Fyrsta skrefið er auðvitað mikilvægast og það er að koma í veg fyrir að gengið festist svona í sessi sem aftur leiðir af sér meiri hækkanir í verðlagi."

Gylfi segir að ef horft sé á þær hremmingar sem eru að gerast í kringum okkur sé enn mikilvægara að auka trúverðugleikann öðrum þjóðum fyrr. Það verði meðal annars gert með djörfum ákvörðunum af hálfu stjórnvalda.

„Ég verð að viðurkenna það að þegar stjórnvöld átta sig á alvarleika þessa máls þá hljóta íslenskir stjórnmálamenn að setja hagsmuni þjóðarinnar í fyrirrúmi."