Saka Garðabæ um að brjóta ný grunnskólalög

Foreldrar grunnskólabarna í Garðabæ saka bæjaryfirvöld um að brjóta ný lög um grunnskóla með því að niðurgreiða ekki skólamáltíðir, eins og lögin kveða á um.

Í bréfi sem foreldrarnir sendu bæjaryfirvöldum í Garðabæ segir að bærinn innheimti hærri gjöld fyrir máltíðir en Hafnafjörður, Kópavogur og Reykjavík.

Foreldrarnir fara þess á leit við bæjaryfirvöld í Garðabæ að þau leiðrétti stefnu sína í matarmálum grunnskólabarna og setji upp gjaldskrá fyrir málsverð grunnskólabarna, þannig að verð máltíðar miðist við hráefniskostnað líkt og farið sé fram á í lögum um grunnskóla.