Laun Jakobs umtalsvert hærri en gengur og gerist í Ráðhúsinu

Svandís Svavarsdóttir, borgarfulltrúi Vinstri - grænna, segir laun Jakobs Frímanns Magnússonar hjá borginni í starfi framkvæmdarstjóra miðborgar umtalsvert hærri en gangi og gerist hjá verkefnastjórum í Ráðhúsinu.

Svandís ræddi ráðningu Jakobs í starfið í Kastljósi í kvöld og sagði um pólitíska ráðningu að ræða. Beita ætti faglegum og réttum vinnubrögðum við ráðningar hjá borginni.

Svandís benti enn fremur á að hinn svokallaði hundrað daga meirihluti hefði auglýst stöðu verkefnisstjóra á skrifstofu borgarstjóra. Hátt í tveir tugir hefðu sótt um, vel menntað fólk og reynt. Þann 21. janúar, þegar núverandi meirihluti hefði tekið við, hefðu þrjár umsóknir verið eftir til skoðunar og þær lægju enn á skrifstofu borgarstjóra. Hún teldi mjög líklegt að það fólk sem þarna sótti um væri mjög hugsi yfir ráðningaraðferðunum nú.

Jakob Frímann fær samtals 860 þúsund krónur í mánaðarlaun hjá borginni. ,,Mér vitanlega eru þetta laun sem eru umtalsvert hærri heldur en verkefnisstjóra sem starfa í Ráðhúsinu," sagði Svandís og bætti við að í þessu tilviki væri verið að greiða mun hærri laun en gengi og gerðist í Ráðhúsinu. Jakob væri að líkindum á pari við aðstoðarmann borgarstjóra.