Þakklátur þeim sem trúðu að ég væri heiðarlegur maður

Jón Ólafsson segist ekki getað annað en lofað drottinn og vonar að málinu sé hér með lokið. Meintum skattalagabrotum Jóns var vísað frá dómi að öllu leyti í morgun. Rannsóknin hefur tekið hátt í sjö ár og hefur haft mikil áhrif á Jón og hans fjölskyldu.

„Þetta hefur haft mjög slæm áhrif á mig og mína fjölskyldu á þessum tíma. Það er fullt af viðskiptatækifærum sem hafa farið forgörðum vegna þessa en nú hefst bara ný tíð vonandi og ég er virkilega þakklátur því að þessu sé lokið," segir Jón í samtali við Vísi.

Jón segist allan tímann hafa haft trú á því að þetta færi svona enda hafi þarna verið á ferðinni stormur í vatnsglasi. „Ég er ánægður fyrir mína hönd og minnar fjölskyldu og samstarfsaðila sem hafa haft trú á því að ég sé heiðarlegur maður með því að hafa treyst mér og trúað, þessu fólki er ég þakklátur," segir Jón sem segist hafa fundið fyrir miklum stuðningi hér á landi á meðan málinu hefur staðið.

Aðspurður hvort hann óttist ekki að ákæruvaldið áfrýji frávísuninni segir Jón. „Ég get auðvitað ekki svarað fyrir þá en þeir eru þekktir fyrir að áfrýja öllu sem þeir geta."