Meintum skattalagabrotum Jóns Ólafssonar vísað frá dómi

Ákæru vegna meintra skattalagabrota Jóns Ólafssonar athafnamanns var í morgun vísað frá í Héraðsdómi Reykjavíkur. Jón hefur legið formlega undir grun í tæp sjö ár og fagnar verjandi hans úrskurðinum. Ásamt Jóni voru þeir Hreggviður Jónsson, Ragnar Birgisson og Símon Ásgeir Gunnarsson ákærðir og var málum þeirra tveggja fyrrnefndu einnig vísað frá en kröfu Símons um frávísun var hafnað.

Efnahagsbrotadeild Ríkislögreglustjóra gaf út ákæru á hendur Jóni fyrr á árinu en honum er gefið að sök að hafa svikið um 360 milljónir króna undan skatti í tengslum við rekstur Norðurljósa og tengdra félaga.

Verjendur mannana bentu á að þeim Jóni, Hreggviði og Ragnari hafði þegar verið gerð refsing í málinu þegar skattstofnar þeirra voru endurákvarðaðir af ríkisskattstjóra auk þess sem þeim hafi verið gert að greiða sérstak álag ofan á þá. Því væri ekki hægt að dæma þá á ný fyrir sömu sakir. Á þessi rök féllst héraðsdómur í dag.

„Ég er búinn að velta þessu máli fyrir talsvert lengi og hef látið reyna á það einu sinni áður fyrir Jón Ólafsson í Hæstarétti og þá var frávísun hafnað af tæknilegum ástæðum," segir Ragnar Aðalsteinson, verjandi Jóns. „Síðan var látið reyna á það aftur núna."

Ragnar og segist búast við því að málið verði til þess að breytingar verði gerðar á lögum. „Þetta mál mun örugglega ýta á þær breytingar sem hafa verið í farvatninu í nokkurn tíma án þess að frumvarp hafi komið fram," segir hann.