Lausafjárkreppan hægir á framkvæmdum við Reykjavíkurhöfn

Lausafjárkreppan og gjörbreytt viðhorf til einkabílsins eru ástæður þess að eitthvað dregst að reisa viðskiptamiðstöð og lúxushótel við Reykjavíkurhöfn.

Bygging viðskiptamiðstöðvar, Tónlistarhúss og lúxushótels átti að haldast í hendur á þessum stóra reit. En þá voru aðstæður aðrar. Forstjóri Nýsis vildi engu spá um það í samtali við fréttastofu í dag hvenær miðstöðin gæti risið - einungis að farið yrði af stað svo fljótt sem Nýsir hefði tök á fjármagna bygginguna.

Lúxushótelið frestast líka - ekki vegna lausafjárþurrðar heldur gjörbreyttrar afstöðu manna til einkabílsins í skipulagi, segir framkvæmdastjóri Portus. Því hafi sú hugmynd að koma Geirsgötunni í stokk komið seint inn og það kosti breytingar á nærliggjandi byggingum. Hótelið átti að opna næsta vor en þær framkvæmdir dragast nokkuð.

Nú er því útlit fyrir að prúðbúnir gestir verði farnir að dreypa á kokkteilglösum og hlýða á fagra tóna í Tónlistarhúsinu minnst einu til tveimur árum áður en reiturinn verður kláraður. Ófrágengnir grunnar munu þó ekki blasa við tónlistarunnendum. Búið verður að steypa bílakjallara og ganga frá torgi.