Fékk purusteik og pakka á spítalann

Fimm börn hafa dvalið á Barnaspítala Hringsins í dag og fékk eitt þeirra fjölskylduna í heimsókn í gærkvöldi með purusteik og pakka.

Á hverju ári þurfa alltaf nokkur börn að dvelja um jólin á Barnaspítala Hringsins. Gunnar Jónasson, yfirlæknir Barnaspítala Hringsins, segir sjö börn hafa dvalið á spítalanum í nótt. Hægt var að útskrifa tvö þeirra í morgun og voru því fimm þar í dag. Börnin eru á aldrinum sex mánaða til fimmtán ára. Hann segir töluverðar annir hafa verið á bráðamóttöku barnaspítalans í nótt eða mun meiri en yfirleitt á hátíðisdögum. Þangað leituðu fimmtán börn frá því klukkan tíu í gærkvöldi til klukkan þrjú í nótt.

Á meðal þeirra barna sem dvalið hafa á spítalanum um jólin er Jón Arnar Hjálmarsson, tveggja ára snáði, sem var lagður inn á Þorláksmessu eftir að hann fékk sýkingu í ökkla. Þar er hann ásamt mömmu sinni. Mæðginin reyndu þrátt fyrir spítaladvölin að gera aðfangadagskvöld sem hátíðlegast. Fjölskyldan kom með mat og pakka og fagnaði jólunum saman á barnadeildinni. Lilja Ósk, móðir Jóns, segist hafa átt hátíðlega stund á spítalanum enda séu jólin þar sem fjölskyldan er.