Björgvin útilokar ekki eignaupptöku hafi auðmenn brotið lög

Björgvin G. Sigurðsson, viðskiptaráðherra, útilokar ekki hörku gegn íslenskum auðmönnum reynist þeir uppvísir að lögbrotum og að eignir þeirra verði sóttar til útlanda.

Þessu fólki beri skylda til að koma með eignir sínar til landsins til hjálpar íslensku þjóðinni. Engu máli skipti hvort þeir hafi menntað sig, starfað, eignast auðævi sín eða búið erlendis allt sitt líf.

Ráðherra segir það samfélagslega og siðferðilega ábyrgð íslenskra auðmanna að aðstoða íslenska ríkið. Sérstaklega beindi hann orðum sínum að Björgólfsfeðgum og öðrum sem hafa komið að íslensku bönkunum sem eru fallnir með tilheyrandi vandræðum.

Ásgeir Friðgeirsson, talsmaður Björgólfs Thors, sagði í samtali við fréttastofu Stöðvar 2 rétt fyrir fréttir að Björgvin hefði óskað eftir fundi með Björgólfsfeðgum, saman eða í sitthvoru lagi, tímasetning eða umræðuefni hefði ekki verið gefið upp en honum þótti einkennilegt að fundarboðið færi í gegnum fjölmiðla.

Hann hefur þó fulla trú á því að feðgarnir myndu hitta ráðherrann þegar tími gæfist til.