Icelandair: Reynt að koma í veg fyrir frekari uppsagnir

Icelandair hefur óskað eftir því við flugfreyjur og flugliða félagsins að þeir minnki við sig starfshlutfall eða fari í launalaust leyfi vegna samdráttar í flugi. Menn eru að reyna að koma í veg fyrir uppsagnir, segir Rannveig Eir Einarsdóttir forstöðumaður farþegaþjónustu. Flugfreyjur og flugliðar fengu tölvupóst með þessum óskum í gærkvöldi.

Um 300 manns starfa sem flugfreyjur og þjónar hjá Icelandair en stöðugildin eru 240. Rannveig Eir kveðst þegar hafa fengið viðbrögð við póstinum.

Hún segir þetta fyrsta skrefið til að mæta samdrætti í flugi og menn séu að reyna að forðast uppsagnir í lengstu lög.

Um 130 starfsmenn Icelandair eru að missa vinnuna nú um mánaðamótin, en þeir fengu uppsagnarbréf í júlí.