Segir tímabært að skoða siðvæðingu fjármálageirans

„Við vorum einmitt að samþykkja ályktun um sparisjóðina almennt og umhverfi fjármálafyrirtækja," sagði Katrín Jakobsdóttir, varaformaður Vinstri hreyfingarinnar - græns framboðs, innt álits á stofnfjáreign Árna M. Mathiesen fjármálaráðherra í Byr. Vísir fjallaði um málið í gær og ræddi þá við Árna Pál Árnason, þingmann Samfylkingarinnar, sem taldi réttast að setja upplýsingalög um hlutafjáreign þingmanna og ráðherra.

Katrín sagði tímabært að skoða siðvæðingu fjármálageirans og koma af stað lifandi umræðu um siðareglur fjármálafyrirtækja. „Það er kannski ekkert óeðlilegt við það að stjórnmálamenn séu stofnfjáreigendur en það er spurning hvernig það skarast við þeirra pólitík og þeir verða auðvitað að gæta sín ansi vel á því að misnota ekki aðstöðu sína," sagði Katrín.