Aðrar þjóðir geta hugsanlega lært af Íslendingum ef vel tekst til

Ingibjörg Sólrún Gísladóttir utanríkisráðherra segir að ef Íslendingum takist að leysa efnahagsvandann á öruggan hátt geti aðrar þjóðir hugsanlega horft til þess. Þetta kom fram í viðtali við hana í Markaðnum á Stöð 2 í morgun.

Ráðherra sagði að segja mætti að Ísland væri það land þar sem efnhagsfárviðrið hefði fyrst skollið á. Það sem hefði gerst á Íslandi gæti gerst annars staðar.

Ingibjörg var spurð út í þau orð fræðimanna á borð við Richard Portes og Ólafs Ísleifsson að þjóðnýting Glitnis hefði hrundið af stað skriðu í kerfinu sem ekki hefði verið hægt að stöðva. Ingibjörg sagðist ekkk hafa forsendur til að meta það en allir aðilar hefðu reynt að gera sitt besta. Aðalatriðið nú væri að koma okkur í skjól til þess að fá fleiri aðila til aðstoðar hér á landi.

Enginn sá fyrir fárviðrið

Vísað var til fréttar Berlingske Tidende fyrr á þessu ári þar sem Ingibjörg Sólrún sagði að bankar landsins gætu reiknað með stuðningi ríkisins, jafnvel með beinu framlagi, og að stjórnvöld myndu ekki láta það líðast að bankarnir yrðu gjaldþrota. Spurð út í þessi orð sagði Ingibjörg að staðan hefði verið sú að bankarnir hefðu staðið vel í samanburði við aðra banka. Allar forsendur hefðu verið fyrir því að þeir stæðu af sér kreppuna en enginn hefði getað séð fyrir fárviðrið sem yfir okkur hefði komið og að allt myndi botnfrjósa.

Spurð um þá kröfu úr röðum Samfylkingarinnar að bankastjórn Seðlabankans víki og hvort ekki væri kominn upp fullkominn trúnaðarbrestur milli ríkisstjórnarinnar og Seðlabankans sagði utanríkisráðherra að hún hefði margsinnis sagt ekki ætti að skipa fyrrverandi stjórnmálamenn í stjórn Seðlabankans. Mikilvægt væri að við hefðum seðlabankastjóra sem nytu mikils trausts og hún hefði sagt að mikilvægt væri að stjórn Seðlabankans skapaði forsætisráðherra svigrúm til breytinga með því að segja af sér.

Þarf að liggja fyrir sem fyrst hvert við stefnum

Þá sagði Inigbjörg aðspurð að skoða þyrfti peningamálastefnuna og hún teldi að liður í því væri að horfa til ESB og evrunnar og bakstuðnings frá Seðlabanka Evrópu. Þetta væri umræða sem fara þyrfti fram á Íslandi. Það þyrfti að liggja fyrir innan ekki of langs tíma hvert við stefndum í peningamálum.

Enn fremur sagði ráðherra að það væri mjög mikilvægt að það skýrðist á allra næstu dögum hvort og hver aðkoma Alþjóðagjaldeyrissjóðsins yrði hér á landi. Hún teldi jafnframt að aðstoð við Íslendinga yrði að vera fjölþjóðleg.