Segir Samfylkinguna beita Albaníuaðferðinni

Að mati Magnúsar Stefánssonar, þingmanns Framsóknarflokksins, vekur athygli hversu opinskáir þingmenn og ráðherrar Samfylkingarinnar eru í gagnrýni sinni á störf sjálfstæðismanna í fyrri ríkisstjórnum.

Magnús gerir að umfjöllunarefni á heimasíðu sinni umræðu um efnahagsmál á Alþingi í gær og gagnrýni Samfylkingarinnar á seinustu ríkisstjórn eftir að flokkurinn tók sæti í stjórn með Sjálfstæðisflokknum.

,,Í þessari ríkisstjórn er sami forsætisráðherra og var í fyrri ríkisstjórn, hann var þar áður fjármálaráðherra og í þessari ríkisstjórn er sami fjármálaráðherra og var í fyrri ríkisstjórn. Það vita allir sem vilja að efnahagsstjórn er helst á ábyrgð þessara tveggja ráðherra. Fleiri dæmi um aðra málaflokka mætti nefna í sömu veru. Málflutningur þingmanna Samfylkingar með gagnrýni á fyrri ríkisstjórn er því beint að þessum ráðherrum Sjálfstæðisflokksins, þótt svo "Albaníuaðferðinni" sé beitt, þ.e.a.s. með því að skamma Framsókn," skrifar Magnús.

Magnús telur a Samfylkingin ætli sér að halda uppi gagnrýni á Sjálfstæðisflokkinn í gegnum Framsóknarflokkinn með það að markmiði að veikja stöðu sjálfstæðismanna á meðan að flokkarnir starfa saman.

Pistil Magnúsar er hægt að lesa í heild sinni hér.