Mönnunum var sagt að fara ekki í rörið

Mönnunum tveimur sem létust í aðveituröri í Hellisheiðarvirkjun í gærkvöldi, hafði verið sagt að fara ekki inn í rörið. Þeir fundust látnir um metra frá opinu sem þeir gerðu.

Vinnudegi mannana, sem voru Rúmenar, var að ljúka um sjö leytið í gærkvöldi þegar samlandi þeirra og verkstjóri fól þeim það verkefni að gera gat á eitt af aðveiturörum virkjunarinnar og sagði þeim jafnframt að fara ekki inn í rörið. En til stóð að gera tvö göt á rörið til að lofta um það, þannig að vinna gæti hafist inni í því í dag við að setja þar svo kallaða öldubrjóta. Verkstjórinn brá sér frá en þegar hann kom til baka fann hann mennina báða liggjandi um metra frá opinu á rörinu. Hann togaði mennina út og hóf þegar lífgunartilraunir sem báru ekki árangur. Kallað var á lögreglu klukkan rúmlega sjö í gærkvöldi.

Mennirnir höfðu báðir unnið hjá verktakafyrirtækinu Altaki í um ár sem sér um járnsmíði við virkjunina. Annar þeirra var 46 ára og lætur eftir sig eiginkonu og eitt barn, en hinn var þrjátíu og þriggja ára og lætur eftir sig eiginkonu og tvö ung börn.

Frétt Stöðvar 2 um málið má sjá hér.