Unnið að rannsókn í Hellisheiðarvirkjun

Ekkert liggur enn fyrir um orsakir banaslyssins í Hellisheiðarvirkjun í gærkvöldi, þar sem tveir rúmenskir starfsmenn undirverktaka létust þegar þeir voru við vinnu inni í stóru vatnsröri. Starfsmenn Vinnueftirlitsins og lögreglumenn unnu að rannsókn fram á nótt, en lík Rúmenanna voru flutt til Reykjavíkur þar sem þau verða væntanlega krufin.

Tilgátur eru um að annaðhvort hafi þá skort súrefni, eða að brennisteinsmettað loft hafi verið í rörinu. Það hafi ef til vill ekki verið búið að lofta það nóg, áður en þeir fóru inn í það.

Gerðar voru ráðstafanir til að veita örðum starfsmönnum á svæðinu áfallahjálp í gærkvöldi, en þar starfa nú um það bil 300 manns á vegum ýmissa verktaka.