Lögregla og sjúkralið frá Selfossi og Reykjavík voru kölluð að Hellisheiðarvirkjun upp úr kl. 19:00 í kvöld vegna alvarlegs vinnuslyss. Lögreglumenn eru ennþá við vinnu á vettvangi en tveir erlendir starfsmenn verktakafyrirtækis létust í slysinu.
Mennirnir sem eru frá Rúmeníu fóru inn í stórt rör sem var tæmt fyrir tveimur dögum af vatni og gufu. Rýmið var súrefnislaust og í kjölfarið misstu þeir meðvitund. Starfsfélagar mannanna náðu að draga þá út og hófu lífgunartilraunir sem báru ekki árangur.
Slökkviliðið sendi sjúkrabíla, dælubíl og reykkafara á svæðið. Að auki komu sjúkraflutningarmenn úr Hveragerði.
Rannsókn slyssins er í höndum lögreglunnar á Selfossi og vinnueftirlits. Gerðar hafa verið ráðstafanir til að aðrir starfsmenn sem á svæðinu voru fái viðeigandi áfallahjálp. Starfsmenn Rauða krossins eru á leiðinni og með þeim er rúmenskur túlkur.
