Ófært um Víkurskarð og Melrakkasléttu

Það er ófært og stórhríð á Víkurskarði, ófært er um Melrakkastléttu, og á Vesturlandi er ófært um Fróðárheiði. Veðurstofan varar við stórhríð á Norðurlandi í kvöld og nótt.

Á Norðurlandi vestra er þungfært og stórhríð á Vatnsskarði og Öxnadalsheiði, annars hálka, skafrenningur og éljagangur á öðrum leiðum. Á Norðurlandi eystra er þungfært og stórhríð á Grenivíkurvegi, annars hálka, hálkublettir, óveður og stórhríð á öðrum leiðum.

Á Austurlandi er hálka á Möðrudalsöræfum en einnig eru hálkublettir á Hárekstaðaleið og á Vopnafjarðarheiði. Hálka er á Fjarðarheiði, Oddskarði og á Breiðdalsheiði. Annars er víðast hvar hálka eða hálkublettir.

Hálka og éljagangur er á Hellisheiði og í Þrengslum og hálkublettir eða snjóþekja víðast hvar á Suðurlandi. Ófært er um Nesjavallaleið og þæfingsfærð á Lyngdalsheiði

Á Vesturlandi er hálka á Vatnaleið. Snjóþekja og hálka er víða á Snæfellsnesi. Snjóþekja og skafrenningur er á Holtavörðuheiði og hálka er á Bröttubrekku.

Á Vestfjörðum er snjóþekja, éljagangur og skafrenningur á öllum helstu leiðum.

Á Suðausturlandi eru víða hálkublettir.