Rauði krossinn opnar skrifstofu í Malaví

Rauði kross Íslands hefur opnað skrifstofu í Lilongwe höfuðborg Malaví. Þar mun Hólmfríður Garðarsdóttir starfa sem heilbrigðisráðgjafi Rauða krossins og fylgist með heilbrigðisverkefnum sem Rauði krossinn rekur í landinu.

,,Rauði kross Íslands hefur á undanförnum árum safnað fé, meðal annars í söfnununum Göngum til góðs, sem nú er notað til að styðja alnæmisveika íbúa Chiradzúlu héraðs í Malaví og koma börnum þeirra sem deyja úr alnæmi til mennta. Í verkefnunum er lögð áhersla á heimahlynningu sjúkra, aðstoð við börn sem eiga um sárt að binda vegna alnæmis og forvarnarstarf til að vinna gegn útbreiðslu HiV veirunna," segir í tilkynningu.

Malaví er eitt þéttbýlasta land Afríku með 11 milljónir íbúa. Um 4.100 börn njóta aðstoðar í verkefnum sem Rauði kross Íslands styður í landinu.