Guðjón óttast ekki Sigurjón

Guðjón Arnar Kristjánsson hræðist ekki slag um formannsembætti Frjálslynda flokksins á næsta landsþingi flokksins. ,,Ég hef aldrei óttast kosningar og ég hef aldrei farið á tauginni yfir einni einustu kosningu," segir Guðjón og kveðst ekki hafa hug á að byrja á því núna.

Sigurjón Þórðarson, fyrrverandi þingmaður flokksins, telur rétt að Guðjón Arnar víki til hliðar sem formaður. Fram kom á Vísi í gær að stjórn Frjálslynda flokksins í Eyjafirði hefði skorað á Sigurjón að gefa kost á sér til formennsku í flokknum. Sigurjón segist íhuga að gefa kost á sér.

Guðjón Arnar skynjar ekki undiröldu í flokknum og segir að Sigurjóni sé frjálst að hafa þessa skoðun.

Guðjón Arnar segist ekki hafa hugleitt að draga sig í hlé en hann hefur gegnt formennsku í flokknum undanfarin fimm ár. ,,Ég hef alltaf líst því yfir að ég er ekki á leiðinni út. Ég held að allir viti það."

Aðspurður hvernig samskiptum hans og Sigurjóns hafi verið háttað undanfarið segir Guðjón: ,,Þau hafa bara verið ágæt. Við spjöllum reglulega saman í síma. Ekki daglega þó. Það hefur alltaf verið ágætt á milli okkar Sigurjóns," segir Guðjón og bætir við að honum semji yfirleitt ágætlega við fólk.