Íbúar Seljahverfis fjölmenntu á íbúafund

Fjölmenni var á íbúafundi sem lögreglan á höfuðborgarsvæðinu stóð fyrir í Ölduselsskóla í Seljahverfi í gærkvöld. Í tilkynningu frá lögreglu kemur fram að mikil ánægja hafi verið með fundinn en á honum kynnti lögregla skipulag löggæslu í hverfinu.

„Stefán Eiríksson lögreglustjóri fór jafnframt yfir stöðu mála og svaraði fjölmörgum fyrirspurnum en fundargestir voru nálægt tvö hundruð," segir í tilkynningunni.

Áhyggjur voru viðraðar af innbrotum í hverfinu en tilkynnt var um átján innbrot í Seljahverfi fyrstu átta mánuði ársins. „Á sama tímabili 2007 voru þau fimmtán og sextán árið þar á undan." Lögregla benti á að almennt hafi hinsvegar dregið úr hegningarlagabrotum í Seljahverfi í samanburði við meðaltal áranna 2006 og 2007.

„Á fundinum skapaðist mikil umræða um forvarnarstarf en í þeim efnum geta íbúarnir sjálfir gert heilmargt eins og t.d. með því að taka upp svokallaða nágrannavörslu," segir að lokum.

Nánar má fræðast um tölfræði varðandi Seljahverfi hér.