Meirihluti selur unglingum tóbak

Ný reykingakönnun skekur forvarnarnefnd Hafnarfjarðarbæjar. Meira en helmingur sölustaða með tóbak í Hafnarfirði selja unglingum í 10 bekk sígarettur. "Skelfileg niðurstaða," segir Geir Bjarnason, forvarnarfulltrúi Hafnarfjarðarbæjar.

"Við greinum mikla aukningu frá síðustu árum," segir Geir. Af nítján sölustöðum seldu tíu börnunum sígarettur. "...þess vegna er þessi niðurstaða gríðarlega vonbrigði og maður getur ekki annað en hugsað: Eru þessir staðir þá hæfir til að selja önnur hættuleg efni eins og áfengi?"

Hafnarfjarðarbær hefur verið leiðandi í reykingakönnunum síðustu ár. Fyrir nokkrum árum gerðu sjoppurnar hins vegar uppreisn og sögðu ósanngjarnt, jafnvel ólöglegt, að börn væru notuð sem tálbeitur. Í ár var sjoppunum boðið að skrifa undir samning þess efnis að þær samþykktu könnunina.

"Það er kannski enn meira umhugsunarefni að þrátt fyrir að sjoppurnar viti af könnuninni falli þær á prófinu," segir Geir.

Í fundargerð forvarnarráðs Hafnarfjarðarbæjar er niðurstaðan hörmuð. Tekið er fram að í einni sjoppu hafi barn ekki verið spurt um skilríki heldur hvort það væri "ekki örugglega átján ára".

Svarið var já og tóbakið afhent.

Ekki fást uppgefin nöfn þeirra verslana sem seldu börnunum tóbak. Geir segir ástæðuna þá að bærinn sé stjórnvald og megi því ekki refsa eða mismuna stöðunum. Könnunin verður send áfram til heilbrigðiseftirlitsins sem hefur vald til að sekta eða áminna.

Ekki fást uppgefin nöfn þeirra verslana sem seldu börnunum tóbak. Geir segir ástæðuna þá að bærinn sé stjórnvald og megi því ekki refsa eða mismuna stöðunum. Könnunin verður send áfram til heilbrigðiseftirlitsins sem hefur vald til að sekta eða áminna.

Á grafinu hér til hliðar sést þróun í reykingakönnunum í Hafnarfirði síðustu árin.