Lögmaður krúnukúgarans segir málinu hvergi nærri lokið

Giovanni di Stefano lögfræðingur hins íslensks ættaða krúnukúgara, Ian Strachan, efast um sanngirni sakfellingar skjólstæðings síns. Hann segir málinu á engan hátt lokið og einnig hafi hann fundið atriði sem gæti dregið athyglina frá niðurstöðu dómsins. Ian var á föstudaginn dæmdur í 5 ára fangelsi vegna fjárkúgunar.

Ian Strachan sem áður hét Paul Aðalsteinsson var sakfelldur fyrir að reyna að kúga 50 þúsund pund út úr konungsfjölskyldunni. Hann ásamt öðrum félaga sínum hafði undir höndum upptöku sem þeir tóku upp á farsíma af fyrrverandi starfsmanni konungsfjölskyldunnar. Þar sagði að hann hefði haft mök við viðkomandi og neytt með honum eiturlyfja.

Strachan hefur allan tímann neitað því að hafa viljað fá greitt fyrir upptökurnar og sagði fyrir rétti að þvert á móti hefði konungsfjölskyldan verið fyrri til að bjóða fé.

Lögmaðurinn heldur úti nokkurskonar videobloggi á netinu og í dag fer hann yfir niðurstöðu dómara í málinu. Hann talar um meint kúgunarmál vegna þess að hann telur sakfellinguna ekki hafa verið sanngjarna, þar sem engin játning hafi legið fyrir.

Giovanni talar um að öll gula pressan í Bretlandi hafi tekið þátt í að mála Ian Strachan sem slæman mann. Og nefnir þar sérstaklega News of the world sem var flækt inn í málið vegna þess að Ian hafði boðið blaðamanni söguna um meðlim konungsfjölskyldunnar.

„En þessu máli er á engan hátt lokið," segir Giovanni.

Hann segir einnig að dómarinn í málinu hafa hagað sér mjög undarlega og hann hafi meðal annars látið niðurstöðu sína leka út til fjölmiðla áður en hann greindi frá henni í réttarsalnum.

„Þetta hefur ekkert að gera með sekt eða sakleysi heldur varðar þetta lögin í Bretlandi. Ef þau eru sanngjörn hvers vegna er þá í lagi að útiloka ákveðin sönnunargögn?," spyr Giovanni.

Hann segist vera búinn að finna atriði sem líklega muni draga athyglina frá niðurstöðu dómsins og má því ætla að málinu verði áfrýjað.